Zerqawî, Mela û Xetîbên Mizgeftan li Îraqê bi kuştinê tehdît dike

KSN/ 13/8 2005-Serokê rêxistina el-Qaîde beşê Îraqê Ebu Museb el-Zerqawî,  Mela û Xetîbên Mizgeftan li Îraqê bi kuştinê tehdît dike ku eger ew destûra Îraqê bi pejirînin. Zerqawî, di daxwîyanîyek ku li ser înternetê hatîye belavkirin de dibêje;  Ew Mela û Xetîbên ku dengê erenî bidin destûra Îraqê ya ku tê amadekirin an ji beşdarîyê di dengdana referandumê de bikin, ew " murtedin" û wê werin kuştin.

Zerqawî bang li Melan dike ku ew li himbrî Xwedê Teala  ji her gotineka ku ji devê wan derdikevin berpirsin û em hukmê murtedan li ser hemû kesên ku dengê xwe yê erenî bidin destûra Îraqê bi cîh tînin. Di daxwîyanîyê de waha tê gotin: Hûn çewa dengê xwe didin destura ku ji alîyê Telebanî, Berzanî û Sîstanî ve tê amadekirin. Destura Îraqê li dijî şerîeta Muhemed Pîximber e silavên Xweda lêbe.

Li gora Zerqawî, ew bi tenê li ser rêya Qur`an û Suneta Pêximber in û yên din hemû li ser rêya batil in.

ŞÎROVE

-Dema min ev nûçe amadekir gelekî tişt hatin bîra min. Gelo Zerqawî hukmê murtedan ji kudera Qur`ana pîroz derdixîne? Di Qur`anê de ayetek wusan vekirî tuneye ku ew kesên  ji dînê xwe derkevin dibin murted û divê werin kuştin û suneteka Muhemed Pêxember jî tune. Lê di mezheban de hukmê kuştina Murtedan heye û ev jî bi tenê nêrîna Îmamên Mezheban e û her kesî girê nade.

-Ya dudîyan, Zerqawî, binavê Îslamê rojê bi  10an kesên bêrî, jin û zarokan qetil dike. Ev karên nemirovî û li dijî rêbaza Îslam û Pêxember, ji kîjan Hedîs û Sunetên Pêxember derdixîne..?

-Ya sisîyan, dema Sedam Huseyin bi  10 hezaran xelkî Kurd, Şîî û xelkên Îraqê qetil dikir, wê demê Zerqawî li kubû, di bin baskê Sedam de çi dikir?..

Tîştên Zerqawî û yên wekî wî dibêjin, tu eleqekî wan bi dînê Îslama ku ji Qurana pîroz hetêye girtin tune. Lê Zerqawl li gora kultura ereban ya ku ji Emewîya hatîye girtin tevdigere û vîya jî wek rêbaza Îslamê nîşan dide.

Çevkanî: Îlaf

Amedekar: Dilbirîn