VEGERA REŞ

                          

Rê herî

Deriyê ji derve vekirî wek deriyê hundir

Erd cemidî dîwar ker û ez stûxwar

Êvaran de barana şor dibare

Her du şibakên bêcam de

Laşê min sar doşek cemidî û dirêjin şevên xayin û bêhn fireh

Elimandine roja hefta ez bi rê

Û ber deriyê xesûyê

Îro roja heşta ez li mal

Ne remezana şerîf ez bi rojî

Destê min de tizbiya sî û sê lib

Bîsmîlahîrahmanûrehîm sî û sê car navê xanima delal

Şêst û şeş car ber qeza û bela

Mele nimêja êvarî elan dide

Deng nexweş bi kul

Ker halê ker a

Lal halê lal a

Ma qey dil bi halê dil a nizane

Ber guhê min ê çepê de laşê bêkefen kirî

Ber guhê min ê rastê de nimêja helal kirî

Ser dilê min de helbesta min a ne temam kirî

Were were pêl heriyê bik

Deriya bigir pêl merşê bik

Ser doşeka hirî rûnê min şiyar bik

Mirî di qebra reş de şiyar dibin

Heta ku serê wan li kevirê heda keve

 

Şoreş SEYDA