KSN/ 29/8 2005- Serê du hefteya bû ku Serokê Herema Kurdistanê Mesûd Berzanî çûbû paytextê Iraqê Bexdayê. 

Piştî bazariyên zor û zehmet û di qanûna bingehîn de bicîhkirina daxwazên gelê kurd îroj bi balafirê digel hin nûnerên gelê kurd vegeriyan Paytextê Herema Kurdistanê Hewlêrê.

Serok Berzanî ji hêla cemawereke welatî û berpirsiyaran ve hate pêşwazîkirin.

Serok Berzanî piştî vegera Kurdistanê derbarê prosesa qanûna bingehîn de daxuyaniyek da çapemeniyê û got:

Em gelek spasdariya hemû kesên ku di vê prosesê de beşdar bûne û bi taybetî spasiya nûnerên kurd dikin ku di hemû deverên baziriyan de û daxwazên gelê kurd de bi awayekî gelekî tund ji bo ku berjewendiyê gelê xwe biparêzin diberxwe dane.

Em vê gavê nikarin bêjin ku hemû daxwazên gelên kurd di vê qanûna bingehîn de hatine bicîhkirin lê belê em dikarin bêjin ku di van şert û mercan de destkevtiyên ji vana mezintir nedibûn. Tiştê ku di qanûna bingehîn de nehate bicîhgirin mafê çarenûsê bû ku ew jî  bi awayekî giştî di maneya qanûna bingehîn de heye; di qanûna bingehîn de yekîtiya bi dilê xwe heye û ev yeka hanê jî di wê wateyê de ye.

Bi bicîhkirina bendên mada 58 an jî dê di sala 2007an de referandûm çêbibe û piştî wê dê tixûbên kurdistanê jiberxwe ve derkevin holê.

Ji ber vê yekê bila dilê gelê kurd rihet be û ji dil û can bi erênî beşdarî prosesa referandûma qebûlkirina qanûna bingehîn bibin.

Li ser pirseke ku ”Nabe ku Qanûnek li dijî dînê Îslamê derkeve!” jî weha got:

Ji xwe em tu carî razî nabin ku qanûnek ne li dîjê dînê îslamê ku bîr û baweriya gelê me ye û ne jî li dijî tu diyanetên dinê derkevin. Lê di heman demê em rê nadin ku qanûnek ku li dijî prosesa demokratbûnê û binpêkirina mafê jinan  derkeve.

Li ser pirsa qebûnekirin û îmzenekirina suniyan jî:

Gelek ji sunniyan bi me re ne û tenê hinekan ji wan qebûl nekirine, em vê gavê nizanin ku ew çiqasa nûnerê gel in jî em dê binerin dê gel biryara xwe bide.

Wekî dinê jî got:

Belê rast e ku karê me yê sereke cîbicîkirina daxwazên gelê kurd bû di qanûna bingehîn de lê di heman demê de me navberçîtiya Şîa û Sunna jî dikir û dixwest ku wan nêzîkî hevûdû bikin.