K: Divê hun soz bidin ku zimanê kurdî nadin fêrkirin! Piştî ku Serokwezîrê tirkiyê hat Amedê û hinek axaftinên xweş kirin wek berdewamî û li ser gotinê xwe rawestînê bi serokê RTUKê re hevdîtinek pêk anî û lê şîret kir ku destûrê ji bo daxwazên televizyona kurdî bide û bihêlin ku weşana bi kurdî bikin. Wek delîl jî da diyarkirin ku çima ew bi zimanê tirkî mafê weşanê ji Ewrûpiyan dixwazin û ew jî destûr didin nîşan da.

Tê ragihandin ku RTUK hêj li ser daxwazên xwe yên berê ye û dibêje ”ji bo ku weşana kurdî bête kirin divê ku xwediyê televizyona soz bidin ku dê zimanê kurdî nedin fêrkirin, weşanên dijayetiyê dikin neweşînin û li binê ekranên televizyonê bi zimanê tirkî wergera gotinên kurdî bête nivîsandin.

Ev daxwazên hanê barê televizyonên kurdî têra xwe giran dike. Ji bo weşana   saetekê belkî ew mecbûr bimînin 6, 7 saetan ji bo karê werger û tiştên wisa bixebitin.

Wekî dinê heke dê fêrkirina zimanê kurdî bête qedexekirin, wateya vê destûrê çiye?

Wateya wê ev e ku bi vê destûrê devê ew nesla ku temenê xwe ji bo bidestxistina van mafên xwe yên mirovî ji dest dan bête girtin û zarokên wan î êdî li malê bi zimanê biyaniya dipeyivin, careke dinê li reh û rêçikên xwe venegerin.

Bila beriya her tiştî bi giyanê tirkayetiyê yê pak û paqij bigihên ku dûvre nexwazin xeletiyeke mîna bi zimanê dayîka xwe axifînê bikin.

Bila dilê ew kesên ku dixwazin li hember zilm û neheqiyê diberxwe bidin baş di cî de be; heke ew bi zarokên xwe re bi zimanê xwe bipeyivin û wan li ser reh û rêçik û çanda xwe mezin bikin û bigihînin, mîna rahiştibin çekên xwe û  bi awayekî  herî dijwar li hemberî dijminê xwe şer û pevçûn kiribin.

Bi rewş û sekna xwe ku mirov bikaribe bendekê li hember vê pêla asîmîlasyonê çêbike ev yek ji hêla dînê Îslamê de jî tiştekî pîroz e; ji ber ku bi vê rewşa xwe em li parastina ayetek ji ayetên Xwedê xwedî derdikevin û nahêlin ku ji hêla rehperestên  çavsor ve bête binpêkirin û tinekirin.

Mucteba Baravî

Dem: 22/8 2005. Seet: 09 00