|
||||||||||||||
|
QAŞO GENERAL E! Lokman Polat STOCKHOLM, 6/5 2005- Peyva tirkî ”Sozde” di kurdî de bi maneya ”Qaşo” ye û sînonîma –hevmaneya- peyvê jî ”Goya” û ”Xwedêgiravî” ye. Peyva ”Goya” bi tirkî nîn e, bi kurdî ye û ketiye nav zimanê tirkan. Weke vê peyvê gelek peyvên din yên kurdî hene ku tirk bikar tînin. Peyva ”Sozde” anku ”qaşo” di masmedia tirkî de li hemberê kurdan wisan pir tê bikaranîn ku divê mirov li ser bisekine. Di masmedia cîhanê de bi tu zimanî di rojnameyan de peyva ku bi maneya ”sozde” ye ewqas pir nehatiye xebitandin. Ev peyv di devê birêvebirên dewletê, general û rojnamevanên tirk de bûye weke benîştê û her dicûn. Herî dawî jî fermandarê ordiya hov di beyana xwe de ji bo kurdan got ”Sozde Vatandaş – Qaşo hemwelatî”. ”Qaşo qirkirina Ermenîyan” , ”Qaşo Kurdistan” , ”Qaşo zimanê Kurdî” , ”Qaşo ala Kurdan” ”Qaşo hemwelatî” û herweha ”qaşo” yên tirkan gelek in. General û birêvebirên dewleta tirkan ji tiştên ku jê ditirisin re ”qaşo” dibêjin. Ew wisa ji kurdan, ji doza netewa kurd ditirsin ku peyva kurdî ya tirsandinê kirine nav zimanê xwe û di axaftina xwe ya rojane de jî peyva ”tirs”ê bi kar tînin û vê peyva kurdî kirine ”Tiristim”. Fermandarê yekem yê ordiya tirk li hemberê kurdan vereşiya û ji bo kurdên bakurê Kurdistanê gote : ”Vana qaşo hemwelatî ne.” Generalên ordiya tirk di dibistanan de bi îdeolojîya fermî a dewleta kemalîst, yanî bi dîtin û ramanên nîjadperest yên kemalîstîyê perwerde dibin. General ji biçûkiya xwe ve di dibistanên razanê –yatili okul- de dimînin û di wan dibistanên razanê de mezin dibin. Ew di jîyana xwe de germîya malbatîyê nabînin. Yek ji wan hez nake û lewre jî ew ji yekê hez nakin û ji civakê re biyanî ne. Di gelek TV-yên tirkî de bi hinek generalên ku teqawid bûne re hevpeyvîn hatin çêkirin. Min bi xwe gohdariya çend hevpeyvînên generalên teqawid kir û min dît bê ew çiqas nezan in, cahil in. Ji xwe rojnamevan M. Alî Birand jî di wan de şaş dimîne û ew di nivîseke xwe de dibêje ”Vana çawa bûne general? Çawa ewqas leşker xistine bin fermandariya wan…” Bi rastî jî şîroveyên generalan tam li gorê gotina ”asker mantigi” bû û nekarê eqila bû. Yanî ji zanîstîyê, ji rasyonalîzmê dûr bû. Nirxandinên wan bi tevahî nerast bû. Ev fermandarên teqawid qaşo general bûne, lê ji tiştek re nebûne, nezan û cahil bûne. Dewleta kemalîst li ser esasê înkarkirina kurdan, zilm û zordariyê hatiye damezrandin û bi derewan hatiye birêvebirin. Di dewleteke weha de dê general û sîyasetmedar çawa karibin rastiyan bibêjin. Ew dûrê rastîyê ne. Serokwezîrê komara Tirkiyê T. Erdogan jî dibêje ”Pirsa kurd tune”, serokwezîr bi eslê xwe tirk nîn e, ew abaza ye. Ew dixwaze kurd jî weke laz, çerkez, abaza, boşnak û hwd, asîmîle bibin, xwe tirk bihesibînin û li doza xwe ya netewî xwedî dernekevin. Na, kurd neweke laz, çerkez, abaza û boşnakan in, ew kurd in û bi serbilindî li doza xwe ya netewî xwedî derdikevin.
|
|||||||||||||
|
