KSN/ 21 10 2005- Li Rojhilata Navîn rejmên dîktator yek bi yek tên hilweşandin û destpot û dîktator, ji alîyê mezlûman de, tên darizandin û ava serê dîktatorên din jî, pêde pêde germ dibin. Di Rojhilata Navîn de, tu miletî bi qasî miletê Kurd, ji dstê zalim û dîktatoran nekişandîye, lê ya herî mirovan dilşad dike ku kurdên kezeb peritî, bi çavê serê xwe darizandina dîktatoran dibînin û wek mucrimekî li ser kursîyê tewanbaran rûdinên.

Wusan dixwîye ku ava serê rijama Suriyê jî hêdî hêdî germ dibe û rejma Suriyê bi destê xwe cila xwe li cehenemê raxist. Wekî mirov dara bin lingên xwe bibire û kuştina serokwezîrê berê yê Lubnanê Refik Heriri, organîze kir û naha jî wê hesabê dek û dolabên xwe yên genî bidin.

Her çiqas rejma Suriyê, şêla întiharê da kuştina wezîrê navxweyî Xazî Kenan  jî, lê dîsa ji destê komîsyona ku li ser kuştina Herîrî lêkolîn dikir, xilas nebû û îroj rapora ku derbarî kuştina Herîrî de hatibû amadekir,  dide isbatkirin ku ereba di kuştina Herîrî de hatîye bi kar anîn, li Suriyê bombe lê hatiye barkirin.

Gelo çima, Emerîka û dewletên Ewrûpa ewqas li ser kuştina Refik Heriri sekinin? Ma berê qet kesên wek Herîrî nehatibûn kuştin? Iroj dewletên rojava, zend û bendên xwe ji bona bi cîkirina edaletê badidin.

Dema bi sedhazaran Kurd dihatin enfalkirin û kîmya barankirin, ev hewarîyên demokirasîyê û xwedîyê edaleta weke şûr tûj li kubûn û bi çi ve meşxûlbûn?

Dema dîktatorîya  Sedam ya herî hov de, dewletên îroj xwedêgiravî bûne hewarîyên edalet û demokirasîyê, heval û dostên Sedam yên herî pêş bûn.

Çiqas dewletên degirkerên Kurdistanê derbarê miletê Kurd de xwedî dîroka reş û tarîn in, ew qas jî dewletên Îngilîz û Emerîka xwedî dîrokeke reş e.

di sedsala 19an de, eskerên Îngilîz bi dweleta Îraqê re mil bi bil li dijî şoreşe Şêx Mehmûd Hefîd, Şêx E: Selam, Şêx Ehmed û mele Mistefa  Berzanî li dijî kuradn şerkir. Û di dîroka miletê Kurd de dewleta herî gunehkar dewleta Îngilîz e ku ew li ser qedera miletê Kurd rûnişt û nehîşt kurd bibin dewlet.

Emerîka ne dostên miletê Kurd e, ew bi tenê dostê menfîeta xwe ye û menfîeta Emerîka li ku be, ew li wur e. Lê tiştek heye, ew jî îroj menfîetên Emerîka û Kurdan li hev hatîye û ji bona menfîetên xwe li gel hev didin û distînin.

Eger riza Emerîka pê tunebe, tu dewletên dagirker nikarin li miltê Kurd zulm bikin. Sedam bi alîkarîya Emerîka miletê Kurd qetil dikirin û îrojî dîsa bi destê Emerîka bi êxdamê tê darizandin.

Lê çi dibe bila bibe, ew dewletên dîktator ku bi alîkarîya Emerîka li ser lingan diman û dstpotîya xwe dimeşandin, îrojî  yek bi yek dîsa bi detê Emerîka tên hilweşandin. Heya Emerîka bi kêrî me were, em ê jê re bêjin merhebe.

Dem hat û dewr derbas bû, êdî keskî nikare hespê xwe li ser hesabê hin kesên din bi kerema dilê xwe bibezîne. Di avêtina her gaveke ne li rê de, wê hesab were pirsîn.

Pirsgirêka Kurd her diçe aktueltir dibe û miletê kurd dibin xwedî gotin û bi destê xwe birînên  xwe derman dikin. Ev  bûyerên erênî yên  ku li gora berjewendîyên kurdan rû didin, hin  erk û wezîfeyên giran dixînin ser milê miletê Kurd.

Divê rêber, desthiladar, rewşenbîr û sîyasetzanên  kurdan, milet li ser hîmeke rast û zanîn û sîyasetek realîst, perwerde bikin. Ne pêwîste ku em li dewletên cîranên xwe binêrin û li gora sîyaseta wan ya gemar sîyasetê bikin û navmala xwe bi xemilînin.

ٌ