Xwepêşandana Brûkselê

Xwepêşandana ku bi destê Yekitîya Komelên Kurdîstan-KOMKAR’ê hatibû amedekirin di 3’ye Çirîya Pêşîn da li Brukselê, li pêş Parlamena Ewrûpa çêbû. Kurdistaniyan bi jin û zarokên xwe, bi al û cilên Kurdî di vê xwepêşandanê da beşdar bûn û daxwazên Kurdan careke din gihandina sîzîyên Yekitîya Ewrûpa û raya giştî.

Pankartek bi zmanê Îngilizî bal dikişand: “Kurd dixwazin li ser axa xwe azad bijîn!”

Li wir bi zmanê Kurdî, Tirkî û bi zmanên Ewrûpî axaftin çêbûn. Serokê KOMKAR’ê yê berê Fettah Tîmar, bi navê Komela Mafên Mirovî ya Kurdistan –IMK Ebûbekir Saydam, bi navê Komela Piştgirî bi HAK-PAR’ê ra Yilmaz Çamlibel qise kirin. Nameya serokê HAK-PAR’ê Abdulmelîk Firat ku ji serokwezîrên devletên endam yên YE ra hatibû şandin û beyana sekriterê Giştî ya PSK Mesût Tek li ser endametîya Tirkîyê hate xwendin.

Di dema xwepenîşandanê da Koma Nemrut bi klam û stranên Kurdî, komikên folklorê yên Hamburg û Wupertalê jî di beşdarîya def û zirnê da bi govendên Kurdî meydana pêş Parlamenê şên kirin.

Civîn bi xwendina Ey Reqîb giha dawî.

Şêxo Burcak-Koln