Saddam Husên Xemgîn bû!

BEXDA, 8/4 2005- Wezîrê Mafê Mirovan Emîn Bextiyar xwest ku Saddam Husên di zindanê de li hilbijartina birêz Celal Talabanî ya ji bo Serok komariya Iraqê bi rêka televizyonê temaşe bike. Hate dîtin ku Seddam Husên ji hilbijartina Mam Celal bi awayekî eşkere nerihet bû û nerazîbûna xwe jî eşkere bilêv kir. 

Lê ev e rastiya dine, îroj dora belengaza ye. Belê dê şîiyên ku Saddam bi sed hezaran ji wan kuştibû û Kurdên ku mina kêzikan hatibûn jahrîkirin welêt birêve bibin.

Gelo Li Gelê Kurd dibe sibe, yan ev xewneke xapînok e ku hemû kurd xwe pê dixapînin.

Hemû Cîranên kurda vê yekê mîna elameta qiyametê yê herî mezin dinirxînin û xwe bi xwe dibêjin ma gelo em dê rojinî ji van rojana xerabtir bibînin.

Rewşeke wisa bînin ber çavê xwe ku yek berî yekî dixwazin Mam Celalê me -yê demekê yek ji mezintirîn dijminê Ereb û Tirkan bû- pîroz bikin...

Gelê Kurd hemû bi vê yekê şad û kamûran bûye. Yên ku bi awayekî eşkere kêf û şahiyê li dar dixin, yên ku  vê kêfxweşiya xwe bi çar kesên li dorhêla xwe ve parê dikin.....

Ev ji bo xêrnexwazên gelê kurd elameta qiyametê ya herî mezin e, rast e; lewra dema ku dewleteke Kurdî ya serbixwe ava bû û kurd gihaştin mafên xwe yê mirovî wê gavê qiyameta wan e, yanî dema hesabdayîna zaliman ya lı hember Xwedê û evda ye, Dema têkçûna sazûmanên wan ên li ser înkarkirina gelê kurd hatibûn avakirin e. ji bo wan roja herî tûj û tahl e ku dê perde ji ser hemû xerabî û pîsîtiyên wan rabe û dê ew bi xwe jî  bi kirêtiya karên ku ta niha bi dilgeşî û xwestek kirine bihesin. Serokatiya Mam Celal li hemû gelê Kurd û Iraqiyan pîroz be û bibe destpêka serdemeke weke ya Selaheddînê Eyyûbî yê Kurdî ku ta niha jî alema İslamê li hember wî bejna xwe ditewînin.